காத்திருக்கும் காதல்

நறுமுகைத் தொட்ட நறுமணத் தென்றல் 
குறுநகை சிந்து மதரம் – சிறுமழை 
போன்று சிலிர்த்திடச் செய்ய மனதினில் 
தோன்றிடும் வானவில் நூறு. 

விண்ணகம் மின்னிடும் வெண்மதி பொன்னெழில் 
கண்வழி சிந்திடும் மின்மினி – பெண்ணெழில், 
மின்னலை விஞ்சிடும் மெல்லிடை யோடொரு 
கன்னலின் ஊற்றாய் சுரந்து. 

சிற்றிடைக் காட்டின் சிறுகுகைக் கொண்டுள 
அற்புதத் தேனடை முற்றிலும்கைப் - பற்றிடும் 
கற்பனை யூற்றது வற்றிடா தூர்கையில் 
சிற்றெறும் பாகும் மனது. 

கற்சிலை யொத்தொரு காண்தக ஓவிய 
வெற்றிலை மீதினிற் வெண்பனி – முற்றுகை 
இட்டிட கொட்டிட ஈற்றிடும் இன்பத்தைக் 
கட்டிடத் தோன்றும் வயசு. 

முற்றிய மோக முடிவிலா ராகமோ 
நெற்றியும் குங்குமச் சங்கமம் – பெற்றதும் 
மெட்டி யொலித்து நிலவு அழைத்திடக் 
கட்டிக்கொள் என்கிறதே காண்! 

கடலது வற்றிக் கருவாடு தின்ன 
மடல்விடும் எண்ணம் மறைத்து – உடலால் 
மனத்தால் ஒருங்கிணைந்துக் காத்திருக்கக் காதல் 
இனத்துக்கு உண்டோ இருப்பு? 

• Twitter
• Facebook
• Google
• Tumblr
• Pinterest